燕豪芬傷疲盡起主場開Ｐ

猪拉多纳

歐霸盃E組上演「雙Ｐ戰」，荷甲一哥燕豪芬（ＰＳＶ）主場鬥希臘彭拿典奈高斯（ＰＡＯ），燕豪芬對歐霸盃野心大，今仗傷疲盡起，主場夠贏狀態低沉嘅彭拿典奈高斯，基於客軍係悶蛋球隊歎慣慢板，就算落後咗都唔會大舉進攻，Alwin相信今仗入波唔會多，燕豪芬會小勝一至兩球，建議簡單捧主Ｗ。

（周五凌晨3時05分開賽）

燕豪芬目前喺荷甲位列榜首，以4分拋離次席阿積士，近期喺聯賽接連兩仗大勝3比0，狀態甚勇，佢哋喺上輪歐霸盃作客以0比1不敵莫斯科戴拿模，但全場形勢佔盡上風，只因防守角球時犯錯致敗，不過該役佢哋殘陣出擊，不能作準。嗰場波缺陣嘅主力球員包括古亞達度同盧克迪莊都已傷愈，今晚齊齊復出，全隊最高身價嘅20歲前線新星迪比亦已復操，今晚會喺後備席候命，隨時上陣搏殺，球隊對歐霸盃充滿鬥心，主場遇弱旅有力重響勝鼓。
彭拿典奈高斯年老態沉

年輕嘅燕豪芬以速度見稱，偏偏對手就係歎慣慢板嘅彭拿典奈高斯，客軍平均年齡大之餘，近況亦差到震，上輪歐霸固然輸畀艾斯杜尼，剛於周末聯賽仲喺主場輸埋畀弱旅希拉克里安，呢支希臘傳統強隊，至今喺聯賽榜已經淪落第7位置，嚟緊周日仲要喺聯賽大戰死敵奧林比亞高斯，對呢支老人兵團確係好大負荷，今晚作客相信又會拖慢比賽節奏盡量慳力，甚至會收起個別主力，事實上佢哋陣中名氣最大嘅前德甲同英超射手柏歷已經年屆33歲，近況亦相當低沉，好難威脅到燕豪芬防線。