國米 聖伊天悶波獻「細」

猪拉多纳

歐霸盃分組賽今晚大把波睇，國際米蘭喺F組主場對聖伊天，或者會悶親你，不過投X角度嚟講又幾值得大家留意，畢竟國米喺意甲形勢告急，要留力聯賽搏殺，加上佢哋喺歐霸盃慣性收起主力，不如玩1.62倍入球細好過啦！

（有線63周五凌晨3:05直播）

國米近排走勢轉差，即使日前喺聯賽主場以2:2賽和拿玻里，依然平息唔到球迷怨氣，甚至傳過佢哋會請莫耶斯領軍，所以嚟緊國米喺聯賽作客切塞納，形勢上非勝不可，否則教練馬沙利要執定包袱，恐怕好難喺歐霸盃踩行油搶分。
國米意甲形勢告急

睇番國米喺分組賽兩戰全勝暫列榜首，今場失分都冇咩所謂，何況國米喺歐霸盃慣性收起主力，前鋒柏拉斯奧、中場加利美度、祖爾奧比同中堅尼曼查維迪都未必會喺今戰落場，要佢哋的起心肝爭取入球，真係唔容易。

另一方面嘅聖伊天近況都幾曳，雖然首席射手艾丁算交到貨，但新簽入嘅諾域治前鋒雲禾夫斯雲高，就明顯未入局，開季至今得1個入球，搞到聖伊天對上兩場分組賽，對卡拉巴克同迪尼普都係互交白卷完場，計落今場都係死守格，玩細最實際。

歐霸盃F組