盈嘉飛駒歐洲長途貨

不死鸟

原來副練的號召力可以咁大陣仗，講梗嘅係黃汝安，今日主角係佢馬房K302「盈嘉飛駒」，這件橙色白V綵衣先前養過匹叫「盈嘉快車」，響4班贏3場1000米，大部份時間養在姚廐，後尾去過賀廐，響兩個馬房都贏過，依家「盈嘉飛駒」就支持安哥，唔知係唔係副練效應呢？呢匹愛爾蘭馬，性能跟昔日同主馬唔同，兩歲跑過兩次，第一場已經跑1600米，再出改爭膠沙地1400米，結果大熱取勝，可見當地人對其場地適應力相當有把握。查族譜，雖則話兩代祖先都係美國馬，但老豆Haafhd係堂堂歐洲3歲王，04年勝出英國二千堅尼和冠軍錦標雙料一級賽。
至於下線，雖則話有同母兄長要去阿聯酋跑泥地至搵到出路，但母系第二代成員唔少響英愛、法國取得成績，即是話「盈嘉飛駒」無理由得膠沙（泥）地一樣瓣數，草地都應該唔輸蝕。路程方面，基於兩歲贏到1400米，加上父母兩線有長力遺傳，將來扳至2000米都不成疑問，這類歐洲中長途馬一般較慢熱，捧場無須心急，等有接近表現才留意都未遲。