(六)12 多蒙特 Vs 漢諾威

猪拉多纳

剛周中歐洲兩大盃賽，德甲球隊威到盡，拜仁慕尼黑、史浩克04、多蒙特、利華古遜、禾夫斯堡同慕遜加柏喺歐聯同歐霸分途出擊，取得全勝，加埋入咗26球只失6球，對黑柴呢啲老德迷嚟講，確實眉飛色舞。當中多蒙特作客4球大炒加拉塔沙雷，喺歐聯分組賽保持3戰全勝兼一球不失，不過佢哋喺聯賽就脫晒腳，近5輪不勝後，排名已經急跌至14位，係過去4年幾以嚟新低，不過周中睇見傷愈復出冇耐嘅馬高列奧斯、米希達利恩同香川真司已經重拾佳態，加埋前線奧巴美揚同阿祖安拉莫斯都交到貨，今晚主場面對近3仗冇波入，近期兩連敗共失7球嘅漢諾威，係時候大勝番場交代嘞！

（有線61及201台周六晚9時30分直播）