西甲打吡 群星大激鬥

猪拉多纳

全球4億觀眾(目及)到實

萬眾矚目嘅「西甲打吡」今晚殺埋身，皇家馬德里喺巴拿貝硬撼死敵巴塞隆拿。兩軍王牌C朗同美斯狀態弗到漏，C朗連續9場有士哥，死對頭美斯亦連續5場入波，仲有近期同樣踢到曉飛嘅尼馬。兩軍前線着晒火，難怪今場大戰全球將有過百國家及地區轉播，預計成4億人收睇，咁精彩張峰梗係支持1.46倍入球大，等睇入球騷啦！

（now632台周日凌晨0:00直播）

據西班牙傳媒所講，呢場「西甲打吡」全球有過百國家轉播，預計足足有4億人收睇，無他嘅，大家都有個「球王」坐鎮，齋睇美斯、C朗大鬥法都過癮。C朗狀態冇得頂係人都知，其實皇馬其他中前場球員都交足功課，好似周中對利物浦梅開二度嘅前鋒賓施馬，融入球隊後表現愈來愈好嘅占士洛迪古斯，就連代替加里夫巴利擔正嘅艾斯高都交到貨，個個都係炮台，邊使慌冇波入？
卻奧斯 + 莫迪歷「弱」防中勝負關鍵

不過你話皇馬冇隱憂咩？又未必喎！卻奧斯同莫迪歷組成嘅雙防中今晚將面臨真正考驗，始終對手係同級嘅巴塞，呢對攻優於守嘅防中組合，踢落明顯比較柔弱，可以喺防守上貢獻幾多，隨時成為今仗勝負關鍵。
蘇亞雷斯回歸「地標戰」搶韁

皇馬有C朗孭飛，巴塞就有美斯搭尼馬呢對「南美天王」抗衡，雖然近期美斯風頭唔及C朗，但佢喺巴塞一向都係入球保證，好少令粉絲失望。而上季聯賽入得9球嘅尼馬，今季有好大進步，聯賽踢咗4分1就入咗8球，暫時係球隊首席射手。況且巴塞仲有等咗4個月嘅「南美第三戟」蘇亞雷斯，今晚終於首度登場，「咬人蘇」餓咗咁耐波隨時勁搶韁，相信佢實好想喺「地標戰」入波吐烏氣，一於買「大」包花生睇呢場入球騷。
Data King：皇馬西甲5連勝

‧兩軍近12次西甲交鋒，巴塞取得8勝2和2負。

‧皇馬聯賽5連勝，每場平均攻入5球。

‧巴塞連續13場西甲未輸過，成績為9勝4和。
乜都玩錦囊：巴塞贏往績平手抵博

皇馬王牌C朗雖然弗到漏，連續9場有波入，但值得留意嘅係，「銀河艦隊」近12次西甲硬撼「地上最強」戰績麻麻，僅得2勝2和8負，信績不妨吼實巴塞2.17倍平手盤。
盤路解碼

以2.5球中位數計，皇馬與巴塞近10次對壘開出9大1細。