紅魔強攻隨時中伏 車仔反擊睇定嚟食

猪拉多纳

英超「超級星期天」爆發重量級大戰，曼聯主場迎戰「一哥」車路士。曼聯主帥尹戈爾一向好大喜「攻」，開季以嚟未能根治到球隊攻強守弱嘅問題，車路士挾住剛喺歐聯大炒馬里博爾嘅餘威，就算首席射手迪亞高哥斯達上陣成疑，但佢哋仲有法比加斯、夏薩特等進攻高手，足以發動嘅凌厲反擊，玩謝紅魔嘅豆腐渣防線，平手盤撐車仔！

（now 621周一凌晨零時直播）
豆腐渣防線 朗尼停賽

儘管尹戈爾帶領荷蘭打世界盃時，礙於人腳有限改踢較防守性嘅352陣式而贏盡掌聲，但呢位老人家骨子裏流住嘅始終係進攻的血，因此一接手曼聯即購入迪馬利亞、法卡奧等重量級攻擊球員，連同原有嘅朗尼、尹佩斯、桑馬達，火力勁到冇朋友。惜針無兩頭利，太過着重進攻卻衍生後防不穩嘅問題，球隊近4場賽事竟失咗9球，對住西布朗同李斯特城之流合共失咗7粒，無論用菲爾鍾斯、基斯史摩寧、莊尼伊雲斯、泰萊布力基以至新兵馬高斯盧祖扼守中路都甩漏多多，就算門將迪基亞幾咁神勇都止唔到血。今仗隊長朗尼仲要坐波監，令球隊整體實力受損。

同尹戈爾好大喜「攻」唔同，車仔主帥莫連奴向來係功利主義者，為咗贏波無所不用其極，佢最怕你唔攻，你做主攻佢就可以踢番最擅長嘅快速反擊。
唔出迪哥 靠矮仔兵團

賽前莫帥確認法國前鋒雷米缺陣及左閘艾斯派古達坐波監，不過佢漏口風話因傷抖咗兩場嘅首席射手迪亞高哥斯達，仍有機會披甲，斯維唔排除「寸王」又放煙幕玩心理戰，因為就算「迪哥」唔出得，佢麾下仲有中場法比加斯、夏薩特、奧斯卡杜斯山度士同韋利安等撐住，呢幾個「小矮人」兵團絲絲入扣嘅地面組織，特別係趁住敵方強攻時伺機作致命反擊，曼聯今仗主攻，真係正中「寸王」下懷。

此外，車仔挾住上周中歐聯大捷嘅氣勢，對住後防堅唔穩陣嘅曼聯可再下一城，鞏固榜首地位，平手盤有買趁早。