QPR怒爆維拉

猪拉多纳

將士用命 打救列納叔

今晚英超獨腳戲，由包尾嘅昆士柏流浪（QPR）主場迎戰阿士東維拉，QPR上仗只因連番擺烏龍先僅敗畀利物浦，反而打起信心，有傳若今仗再輸主帥夏利列納便烏紗不保，眾將誓必為夏利叔拚死一戰，撞正4連敗沉到爆嘅維拉，絕對係搶分良機，QPR小讓平半值得捧場。

（now 621周二凌晨4時直播）

如果有睇上周QPR以2比3不敵利物浦之役，都會覺得QPR輸得堅唔抵，兩個中堅李察鄧尼及哥爾卡先後擺老烏，哥爾卡嗰球仲要係補時5分鐘嘅絕殺，真係冇仇報。不過從好嘅方面睇，QPR末段豁出去反撲勁有氣勢，後備殺手智利前鋒伊度亞度華加斯亦逐漸適應英超兼開到齋，成班波喺逆境下冇再畏首畏尾，只要Keep住呢團火，相信護級仍未絕望。
泰拉拔騷肌駁「肥仔論」

QPR主帥夏利列納賽後喪插麾下摩洛哥中場泰拉拔太肥唔適合上陣，掀起軒然大波，泰拉拔立即影相騷肌反擊，老闆費爾南德斯對於兩人將矛盾公開化非常不滿，有傳如果今仗對維拉再輸嘅話，就會請夏利叔食無情雞。好彩夏利叔一向深受球員愛戴，例如里奧費迪南等球員亦出言力撐老帥，現時無論QPR定夏利叔都處於危急存亡之秋，相信眾將會傾盡全力爭勝。

阿士東維拉經過理想開局後逐漸見底，喺聯賽接連遭阿仙奴、車路士、曼城及愛華頓擊敗，雖然輸畀幾支勁旅唔算肉酸，但一球都入唔到，證明傷愈冇耐嘅比利時箭頭賓迪基明顯未上力，無論狀態及士氣都陷於低潮。最弊係今季表現Sharp醒嘅戴爾夫因傷要抖到12月，缺少呢位中場助陣，令維拉連組織反擊嘅能力都冇埋，正所謂久守必失，好難頂得住開始為護級而踢得如狼似虎嘅QPR，QPR小讓平半，一於撐上盤。