前鋒夠「柏」力！維拉受讓捧得過

猪拉多纳

昆士柏流浪同阿士東維拉兩支近況頹爆嘅隊伍，今晚會喺英超獨腳戲正面交鋒。聯賽4連敗嘅維拉捱完「地獄賽程」之後終於有啖好食，加上比利時射手賓迪基復任正選，由佢夥拍艾邦拉荷同尼索比亞攻堅，點計都比昆士柏秤先，作客受讓平半梗係要1.82倍下盤啦。

（now621周二凌晨4:00直播）
射手賓迪基復出 維拉鋒將侵略性強

驟眼睇今晚兩支主角都冇乜高低，大家近況都咁衰，但公平啲講句，維拉近期確係場場惡啃，阿仙奴、車路士、曼城同愛華頓統統係一線分子，輸波無可厚非。呢4場敗仗入面，維拉1球都入唔到，不過因傷無緣巴西世盃嘅賓迪基已傷愈，預計呢位比利時射手今仗將會復任正選。今季首度擔正，賓迪基當然想做番齣好戲。

最重要係前線上面嘅艾邦拉荷新季已經有2球進帳，快翼尼索比亞就夠晒侵略性，佢兩個拍住賓迪基衝鋒陷陣，絕對有力撕破昆士柏流浪條防線。英格蘭國腳戴爾夫膊頭受傷，最快要出年先至復出，但由艾殊利韋斯活特做「替工」照計影響唔大，況且中堅辛德路斯已告傷愈，今鋪有前又有後。

主隊昆士柏新季英超贏得1場，領隊夏利列納可能壓力太大，最近無端端搵件翼鋒泰拉拔出氣，狂插呢位好波之人發福，估唔到泰拉拔咁唔畀面，轉頭向傳媒騷肌澄清，搞到球會主席東尼費南迪斯走出嚟叫佢兩個收嗲，咪再丟球會架。賽前「夏利叔」話想畀個機會泰拉拔證明實力，分明就係班波冇起色焗住求變，泰拉拔會唔會同佢搏命真係一大疑問。
昆士柏防線甩漏多

「夏利叔」有樣嘢唔好，就係份人衰念舊，去到邊都一定會簽入「契仔」卡蘭積卡，情況就好似今時今日竟然仲用里奧費迪南咁，喂！人哋都成35歲，前日仲宣布會喺季尾退休，你估費迪南仲係以前嗰個一夫當關嘅一級中堅咩！無論用費迪南定抑或「烏龍王」李察鄧尼夥拍哥爾卡鎮守後防都好，昆士柏條防線都係信唔過，仲學人讓波？咪玩啦！
Data King：維拉最後15分鐘冇波入

‧雙方近4次交手有3次打和。

‧昆士柏流浪近5場聯賽場均至少失2球。

‧阿士東維拉係今季英超唯一未試過最後15分鐘入波嘅球隊。
乜都玩錦囊：昆士柏防線「大」穿窿

兩班波都急需搶分反彈，照睇雙方踢落唔會保守，昆士柏上場對住利物浦有2球進帳，證明呢支倫敦球隊有番咁上下火力，奈何近5仗勁失13球嘅防線實在太曳，想頂得住賓迪基嘅進襲唔易，2.25倍大好路呀！
盤路解碼

阿士東維拉上季受讓平半盤路：6勝4負