史雲斯心雄唔赦紅軍

猪拉多纳

英聯盃意義重大

聯賽褪色、歐聯分組賽又冇乜優勢可言，相信利物浦依家冇條件再分心落盃仔身上。佢哋今晚喺英格蘭聯賽盃16強，主場迎戰啱啱中止3場不勝嘅史雲斯，唔似讓得起對手，揀2.13倍「讓客」好過。

（開賽時間：周三凌晨4:00）

難得重返歐聯，可惜紅軍唔爭氣，暫時喺B組同巴素利、盧多格德斯同得3分，出線形勢未明朗，聯賽亦排喺7位，兩條戰線都顧唔掂，仲邊得閒去爭盃仔先？呢班波最大問題係攻不銳守不穩，前鋒巴洛迪利加盟至今只係入得1粒，明顯仲未夾到隊波，射手史杜列治續抖，無論用巴神定仲食緊白果嘅列基林拔攻堅，威脅始終有限。
利物浦Fans不滿波飛貴

令利迷失望嘅又點止差勁成績，唔少利迷喺上場主場鬥侯城中，拉晒橫額投訴門票太貴。英國《每日郵報》報道，紅軍最低門票售價為37鎊（約460港元），不過呢個「至低價」屬全英超第2高，至於季票更高達710鎊（約8,900港元），僅比阿仙奴、車路士同熱刺低，難怪Fans怨聲載道。連球迷都發揮唔到第12人嘅威力，紅軍想輕鬆贏波唔易囉。

對手史雲斯上仗以2:0輕取李斯特城，為球隊3場不勝止血，射手韋菲特邦尼更加係Fit到爆，連續3場「士哥」，今晚配合遠射一流嘅舒維爾同基菲爾施古臣，足夠搗亂紅軍條豆腐防線。領隊蒙克上年曾以「天鵝」隊長身份捧走聯賽盃冠軍，同時係球會史上首個重要賽事獎盃，意義重大，所以佢話大家落場實會搏盡，今次嚟到晏菲路球場唔會咁易投降喎。