光輝主攻大起勝利

猪拉多纳

澳洲足總盃8強賽事，珀斯光輝主場迎戰澳職「一哥」墨爾本勝利，論牌面當然墨爾本勝利秤先，新兵貝利沙同另一前鋒艾奇湯臣拍住上，火力超強，不過珀斯光輝返到主場點會咁容易畀勝利住嚟砌？佢哋都有個托弗射手安迪基奧治，有力同勝利鬥攻，今場捧大盤穩陣啲﹗

（有線64台周三晚7時直播）

澳足盃賽制規定若兩支同組別球隊對碰，就會用抽籤決定邊隊「做東」，今次珀斯光輝行運抽到主場籤，要知道呢班波位處澳洲西面，一般澳職隊到訪要搭幾個鐘內陸機，未踢都腳仔軟，所以佢哋主場一向有料到，加上球隊頭號前鋒安迪基奧治喺頭兩場聯賽已經入咗4球着晒火，今場肯定主動搶攻望再添士哥。
勝利攻強守弱

不過講攻力，作為「一哥」嘅墨爾本勝利當然更勝一籌，前鋒貝利沙完全唔似啱啱加盟冇耐嘅新兵，極速融入球隊，同另一箭頭艾奇湯臣合組恐怖鋒線，上場喺「墨爾本打吡」大勝墨爾本城5比2，佢兩個包辦晒5個入球，非常誇張。但係針冇兩頭利，攻力勁嘅同時就代表住防守唔強，珀斯光輝同墨爾本勝利兩隊今季失波都唔少，勝利今場更有後衞尼高拉斯安素缺陣，大盤更值捧。