不敗森多受讓得米

猪拉多纳

米Sir倒戈幫文帥盜兵符

意甲周中快車重頭戲，米赫洛域率領森多利亞倒戈作客國際米蘭！森多利亞喺呢位塞爾維亞名宿改造下，今季演出脫胎換骨，聯賽八戰仍然保持不敗。反觀國米「七國咁亂」，班主托希爾對教練馬沙利忍無可忍，準備搵舊帥文仙尼回巢領軍，一場變革在所難免，球隊現時人心惶惶，讓唔起森多利亞半一，要下盤。

（TVB 302周四凌晨3時45分直播）

「米Sir」米赫洛域做球員時04年開始効力國米，仲一踢就踢到退休，佢亦曾擔任過國米助教，對「藍黑兵團」熟到不能再熟。值得一提，當年就係文仙尼帶佢去國米，依家知道老友有機會重執國米帥印，米赫洛域梗係要幫一幫手，盡力踢走馬沙利。事實上，森多利亞喺米赫洛域執教下，表現四平八穩，上仗鬥勁旅羅馬亦力保不敗，同祖雲達斯成為意甲僅有兩支不敗之師，今時今日嘅國米想贏佢哋，真係有啲難度。
國米醞釀清洗士氣差

國米上仗贏到切塞納，全因對手門將利亞尼犯規被逐兼輸12碼，但國米最終都只係靠呢球12碼小勝1比0，老闆托希爾自然唔多滿意，準備對球隊進行大清洗，球隊內部充滿不明朗因素，難免打擊士氣。以國米近4場聯賽僅1勝嘅頹勢，今場仲要讓波，放心捧森多好過。