近4場狂轟19球 拜仁食慣漢堡「伊絲執」

猪拉多纳

漢堡今季表現同上季一樣咁曳，到依家仲未喺主場贏過波，今晚轉戰德國盃次輪，喺主場就要對班霸拜仁慕尼黑，認真黑仔。雖然漢堡成績麻麻，但拜仁教練哥迪奧拿都話唔可以因為對手水皮掉以輕心，既然佢哋對漢堡往績贏晒，今晚就捧1.65倍「讓客」！

(無綫明珠台周四凌晨3:30直播)
漢堡火力曳傷兵多

漢堡上季贏咗護級附加賽成功留喺德甲，但今季表現冇乜改善，開季摸和咗拜仁同爆冷擊敗多蒙特後，就了無佳作。佢哋開季至今聯賽只入得3球，鋒力奇曳，亦令後防承受更大壓力，雖然失12球唔係德甲最多，但前線入唔到波，又點可能爭勝呢？最慘就係佢哋仲要傷兵滿營，一直都排唔出最佳陣容，中場伊利斯域、積拉錫同後衞戴克美亞都因傷倦勤，用殘陣又點同巴伐利亞雄師互撼？

雖然漢堡表現差同人腳唔齊，但拜仁主帥哥迪奧拿話輕敵先係球隊最大「敵人」，今場點都要全力以赴。不過拜仁由2010年3月起，12次對漢堡未輸過，雖然上場對慕遜加柏互交白卷，但連埋歐聯，拜仁近4場狂轟19球，攻擊力咁強，要炒漢堡晉級Easy Job啦！