墨城做大騷歡送韋拿

猪拉多纳

韋拿告別戰大騷娛賓！今日下晝澳職獨腳戲，由墨爾本城主場迎戰阿德萊德聯，前者嘅西班牙國家隊士哥王韋拿腳風甚順，加上今仗亦係呢位星級借將嘅澳職告別戰，必想全力爭勝畫上完美句號，不過阿德萊德聯亦非善男信女，墨城隨時前面入埋都唔夠後面輸，大盤乃不二之選。

（有線64及203台周五下午4時40分直播）

近年登陸澳職嘅迪比亞路、希斯基及小野伸二等星級戰將，都令人留下深刻印象，今季被外借到墨爾本城嘅前西班牙國腳韋拿亦唔例外，雖然該隊開咧至今未嘗一勝，但呢位「鬥牛國」史上士哥王絕冇揸流攤，三戰攻入兩粒，包括首仗對ＦＣ悉尼後備入場冇耐即建功追成1比1。可惜，歡樂時光過得特別快，又係時候講拜拜，由於來季加入美職嘅紐約城想佢早啲返去報到，韋拿踢埋今仗就要走人，呢位射手一向有鬥心，梗係想爭取士哥幫墨爾本城開齋，畫上完美句號。
後防不穩入得又失得

除韋拿腳風順之外，墨爾本城亦配備前愛爾蘭國腳杜夫及中場阿倫穆爾等後上支援，火力絕對唔嘢小，眾將都想用勝利為韋拿餞行。之不過佢哋防守認真麻麻，上仗於同市打吡對住墨爾本勝利，畀對方前鋒艾奇湯臣及貝利沙玩到謝晒，最終狂失五粒反勝為敗，今仗仲有莊拿芬謝文奴、加魯斯奧及干洛卓文等中後場悍將上陣成疑，主場迎戰攻守兼備嘅「三哥」阿德萊德聯，谷得太前隨時輸反擊，與其為捧韋拿而揀主勝，斯維建議轉玩入球大，睇住大騷等收錢好過。