鋒力大爆發！史浩克強勢破堡

猪拉多纳

「獵人」亨特拉爾主場奪「堡」！今晚德甲獨腳戲，史浩克04迎戰奧格斯堡，荷蘭射手亨特拉爾近期表現着火，喺自己地頭盡顯「獵人」本色，頻頻有斬獲，今場遇着作客例牌腳軟嘅奧格斯堡，又到亨特拉爾嘅「狩獵」時間，1.78倍主勝依絲執。

(有線61、201及廣東體育周六凌晨3:30直播)

史浩克喺聯賽榜排第12位，踢咗9輪3勝2和4負，睇落戰績唔算標青，上輪作客不敵利華古遜更令2連勝斷纜，似乎唔多撐得過。但其實史浩克今季相當「主客分明」，雖然作客淨係贏過「包艇」嘅雲達不來梅，其餘4場輸晒，不過一返到主場即刻脫胎換骨，至今4戰2勝2和未輸過，當中更包括逼和班霸拜仁慕尼黑，同埋「魯爾區打吡」擊敗多蒙特，堅挺程度唔講得笑！
亨特拉爾「士哥」頻頻

最重要係「獵人」亨特拉爾狀態弗到漏，近期將史浩克主場變成自己嘅「狩獵場」，最近3場分別喺歐聯同德甲出戰馬里博爾、士砵亭同哈化柏林都入到波，今晚配合埋達斯拿、麥斯美亞同祖普莫亭幫手「圍捕」奧格斯堡，亨特拉爾今場要以入波做「戰利品」根本冇難度。

另邊廂，奧格斯堡主場如狼似虎連贏3場，但每到作客就變成「待宰羔羊」，除咗季初德盃不敵德北球隊馬格德堡，今季5場德甲作客波亦輸咗4場，最肉酸係馬達夫斯、哈利艾天托普、波巴迪拿等成班射手夾埋入得1球，今場造訪史浩克相信難逃做「獵物」嘅命運咯！
盤路解碼

史浩克近3次主場鬥奧格斯堡，全部成功開出「讓主」。
Data King：奧格斯堡交手未贏過

‧兩軍過往7次對壘，史浩克04取得5勝2和。

‧奧格斯堡今季6場作客輸5場，其中4場更吞蛋收場。

‧史浩克箭頭亨特拉爾連續3戰主場有斬獲。
乜都玩錦囊：史浩克主場做「大」騷

史浩克往績食住奧格斯堡，德甲連同德盃過去7戰5勝2和未輸過，其中3戰主場都以2球或以上差距贏波，仲全部由頭贏到落尾，今場除咗「讓主」值得捧場，不妨揀埋1.72倍「入球大」及2.6倍「主主」。