霸道藍戰士 恰死QPR！

猪拉多纳

迪哥 法比愈奸愈有計

英超話咁快踢咗9輪比賽，20隊當中只得榜首嘅車路士保持住不敗身，最勁係佢哋入咗24球冠絕英超，平均每場攻入2.67球，一對「奸仔孖寶」法比加斯同迪亞高哥斯達極速融入「藍戰士」，撞啱缺陣車仔4場比賽嘅「迪哥」今晚傷愈披甲，勢必射爆昆士柏流浪條豆腐防線，為車仔上演一場大屠殺，車仔「-2」照捧2.17倍「讓主」！

車路士喺近兩場比賽嘅表現好似有啲跌Watt，上場聯賽盃對住乙組仔梳士貝利都係靠烏龍波先險勝2:1，不過大家要留意，呢場波車仔只係派副選上陣，換句話講，戰績未能作準之餘，一眾主力亦已經養精蓄銳搏今鋪。
迪哥傷愈正選搏殺

講到抖足，又點可以唔提「藍戰士」神箭迪亞高哥斯達先？呢位西班牙國腳早排踢國際賽嗰陣受傷，跟手又話病咗，缺席咗車仔4場比賽，搞到班波嘅鋒力減弱，好彩，一向踢法陰濕嘅「迪哥」，今晚好大機會傷愈復出兼正選搏殺，拍住另一件「二五奸仔」法比加斯搵食，兩條友鬼咁有默契，即使車仔讓到兩球，但主場對住「魚腩」昆士柏流浪，贏波贏盤都根本冇難度啦！
QPR里奧停賽3場

另邊廂，QPR上仗對住另一弱旅阿士東維拉以2:0贏波而回，終止3連敗頹勢，反壓般尼唔使喺聯賽榜包艇。原本QPR對維拉一仗如果輸波，領隊夏利列納好大機會落鑊被炒，不過「夏利叔」唔好開心得咁早喎，事關昆士柏呢班波啲人腳根本未夠班，最勁嗰件里奧費迪南又因為侮辱球迷被罰停賽3場，仲話要造訪史丹福橋添，就算前鋒查理柯士甸腳風幾順都好，前面入埋都未必夠後面輸啦，睇怕QPR今晚都難逃大敗厄運咯！
盤路解碼

車路士近31次主場出戰英超取得26勝，贏波率高達83%。