皇馬追榜首大炒「格」

猪拉多纳

10連勝咪畀佢停

最近狀態弗爆嘅皇家馬德里，今晚重返西甲戰線造訪CF格蘭納達。「銀河艦隊」上周喺國家打吡反勝巴塞隆拿，仲破埋對方嘅聯賽不敗身，士氣同狀態冇得頂，加上「替工」艾斯高要繼續爭氣，對住沉到爆嘅格蘭納達睇嚟都係大炒格，皇馬讓2球照捧2.4倍讓球客勝！

（now632台周六晚11:00直播）

皇馬上周聯賽落後1球後反勝巴塞3:1，最近10場波贏晒之餘，最重要係聯賽追到只係落後巴塞1分，個勢咁好梗係唔好畀佢停啦！近期紅爆嘅C朗，早前喺西甲頒獎禮連奪最佳入球、最佳前鋒同最佳球員3個獎項，人逢喜事精神爽，加上入波入到停唔到，格蘭納達點阻得到佢呀！
格蘭納達跌Watt

仲有，加里夫巴利傷勢好得七七八八，相信都差唔多復出，「替工」艾斯高喺「國家打吡」演出優異贏盡民心，不過教練安察洛堤就話「大聖爺」始終係佢心水正選。艾斯高為咗證明畀「肥安」睇自己有能力擔正，絕對要把握機會「騷哥利」，今場波肯定搏命。

主隊格蘭納達今季開季4場不敗，弊在佢哋前線把握力麻麻，近7場入得3球，搞到近5戰得1和4負，以呢班波近期嘅低迷狀態，點頂得住皇馬呀？