熱刺變陣 反彈良機

猪拉多纳

維拉死火衰到貼地

熱刺創造自08年以嚟最差聯賽開局，領隊普捷天奴備受壓力，好在陣中3大箭頭包括艾迪巴約、蘇爾達杜同哈利卡尼都Fit，當中「盃賽殺手」哈利卡尼更有望首度英超擔正，無論普捷天奴出邊位射手都好，熱刺今晚造訪戰績差到爆嘅阿士東維拉都應該實食冇黐牙，讓平半要上盤。

（now621台周一凌晨0:00直播）
哈利卡尼首度英超擔正

最近7場英超只係贏過1場嘅熱刺，盃賽同聯賽表現判若兩隊，早排試過喺歐霸盃大勝卓普利斯5:1，剛啱亦淘汰咗白禮頓殺入聯賽盃8強，偏偏今季11次上陣攻入7球嘅哈利卡尼就喺聯賽備受冷落，唔少球迷都畀壓力領隊普捷天奴，要求佢喺聯賽重用呢位英格蘭小國腳。英媒賽前話，普捷天奴正準備收起一位中場改打442，今鋪極可能畀哈利卡尼擔正，夥拍副隊長艾迪巴約打雙箭頭，相信呢位年輕人實會把握機會證明實力。

熱刺想反彈嘅話，今晚真係超級「餐士」，事關主隊維拉呢期沉到爆，仲造出球會史上首次英超5連敗兼冇波入嘅羞家紀錄，兼夾係英格蘭各級別聯賽入面入波最少嗰隊，戰績真係衰到貼地。前鋒賓迪基養傷半年復出後明顯冇態，今仗仲要有兩位守將侯頓同辛德路斯倦勤，加埋佢哋近11次喺英超遇上倫敦隊伍輸足10場，今晚主場出擊都唔慌有運行。