AC米蘭主場捉「傻豹」

猪拉多纳

紅黑紅紅黑，就係咁簡單。小弟今周力撐主場出擊嘅AC米蘭！紅黑兵團今晚喺聖西路迎戰巴勒莫，「傻豹」作客例牌腳仔軟，往績贏晒嘅AC今場3分可以話手到拿來。（TVB301台周一凌晨3:45直播）

經過幾季沉淪，AC知恥近乎勇，今季開咧表現對辦，9戰16分排喺前列，唯一敗仗係以0:1僅輸畀榜首嘅祖雲達斯。雖然近況有些少回落，連續兩場和波，幸好AC喺聖西路專恰巴勒莫，對上兩次喺意甲交手，分別贏2:0同3:0。
巴勒莫今季作客未贏過

AC後衞阿歷士洛里高賽前講明今場一定要贏，有雄心壯志係好事，但AC開季以嚟，得1場能夠保持清白之身，今場仲要有中場硬漢蒙達利坐波監，呢位巴西中堅防守方面真係要下多啲苦功喇，唔係入埋都唔夠輸呀。好彩射手本田圭佑勁Fit，今季已經入咗6球，絕對係AC頭號人物，希望呢位日本國腳可以快啲帶起埋費托同艾沙拉維啦。

睇淡巴勒莫除咗因為近年畀AC剋住外，佢哋今季作客戰績亦都麻麻，錄得1和3負，近兩場對安玻里同祖雲達斯夾埋吞咗5蛋仲無波入，首席射手法蘭高華斯基斯對上5場食白果，上場贏基爾禾嘅入波功臣列干尼又停賽，「傻豹」攻力疲弱，就算面對不穩嘅AC後防，亦未必攞到着數。