尹戈爾朗尼 打吡智多星

猪拉多纳

英超今晚上演史上第168場「曼市打吡戰」，對上4年，曼徹斯特球隊包辦全部4次聯賽冠軍，曼城喺主場對曼聯，為面子肯定打甩髀。不過紅魔領隊尹戈爾應付國家級打吡特醒，加上曼市打吡史上最佳射手朗尼復出，趁住萬聖節氣氛未減退，兩個「曼聖魔王」降臨隨時嚇親你。

曼聯今季狂燒1.5億鎊（約18.6億港元）擴軍，但經過9輪聯賽，反而比上季同期少1分，搞到新領隊尹戈爾被網民瘋狂恥笑。英國傳媒都鬧佢領軍渣過以破羞家紀錄當食飯嘅「天才」莫耶斯，就連曼城領隊比歷連尼都忍唔住踩多腳，賽前話紅魔同上季「差唔多」，擺到明落對方面。
逼和車仔派靚錶 尹帥打吡8成不敗

不過大家又咪以為，尹戈爾會任人恥笑乜都唔做，好似上星期曼聯完場前入波以1:1逼和車路士，佢就得到贊助商寶路華幫助，豪送每位球員一隻奢華手錶，跟手又下令解除聖誕聯歡會禁令，容許球員癲番晚，目的係收買人心同提升士氣，所以向來有唔少球員願意為佢賣命。
闊面神童攻力勁 同市對撼士哥王

或者有人覺得尹戈爾嘅戰術過時，同鄉古華特更作反話佢唔識玩英超，但實際上，佢以往執教阿積士、巴塞隆拿同拜仁慕尼黑，30次領軍出戰國家級打吡戰，總共有17勝8和5負，不敗率達到83%，難怪佢賽前夠膽話：「我唔會羨慕曼城嘅陣容，而且今場我哋有好大勝算。」

尹戈爾仲親口確認，停賽刑滿嘅朗尼可以傷愈復出，以往佢11次出戰曼城攻入22球，屬於「曼市打吡戰」史上最佳射手。最近英國仲有研究顯示，闊面嘅人一般睇落更有攻擊力，荷里活影星史泰龍就係最佳例子，今場朗尼回歸隨時又會同對手埋牙，兩個「曼聖魔王」降臨大家咪瞌眼瞓。