鯨魚東京「大」顯身手

猪拉多纳

國家隊教頭入場睇辦
日職 12:00 （日）3

名古屋鯨魚Vs FC東京

「老細」嚟睇辦，仲唔交足貨？今日場日職名古屋鯨魚對FC東京，本來冇乜好爭，但係日本隊主帥艾古爾放咗風會入場睇波，兩隊啲新進或者邊緣國腳，馬上打醒精神，博畀呢個墨西哥籍教頭睇中，呢場波應該唔會係悶戰，1.87倍入球大抵玩。

家陣FC東京雖然排第7位，不過距離第3、4位嘅鹿島同川崎，爭咁成6分咁多，剩低嗰4輪聯賽你話佢哋追得到，可以躋身三甲攞到亞冠盃入場券，真係1賠10都未必有人敢博。名古屋就仲衰，40分排12位唔上唔落，完全係等收工格局，中鋒約舒亞堅尼地亦宣布埋下季返去澳職添，班人根本冇乜奮鬥目標。
太田宏介上位狂擦艾帥鞋

但係艾古爾嘅出現，就令場波完全唔同晒嘞。剛啱入選咗「艾家軍」嘅東京後衞太田宏介，自然係最興奮嘅一個，佢唔單只公開話歡迎艾古爾入場睇波，仲話到明有「艾生」在場，係佢搏殺嘅一大動力。事實上太田呢期响東京紅到爆，唔單只做咗FC東京官方雜誌12月號嘅封面男，會方為咗慶祝佢入選日本隊，專登响今個月22號主場對新潟場波，搞個「宏介坐位」活動答謝Fans，有666個座位（太田响東京着6號波衫）張飛只賣2,100日圓（太田响日本隊着21號），比平日平咗1,000日圓，票尾有太田親筆簽名同埋可以抽獎添，認真大陣仗，所以唔到太田唔搏。

其實除咗太田之外，FC東京當紅前鋒武藤嘉紀，同埋名古屋王牌鋒將永井謙佑都爭緊寵，希望得到艾古爾嘅信任，所以今場波絕對係日本邊緣國腳嘅爭位Show。由於近況比較好嘅東京，有龍門權田修一撼親個頭多數唔出得，名古屋亦有中場田口泰士、丹尼臣哥度巴坐波監，後衞列捷斯腳傷，兩邊陣容不整又要為面子搏殺，開大有乜出奇。