保頓主場碌卡做靚績

猪拉多纳

現時喺英冠排尾二嘅保頓，日前傳出有泰國財團想收購，但會方似乎想吊高嚟賣，因為對方價錢唔係咁好，估計保頓近期都要做靚個績，起碼要留番喺英冠先可以吊高嚟賣，今仗佢哋喺主場迎戰作客蟲卡迪夫城，平手盤抵玩。

（周三凌晨4時開賽）
嫌泰國財團出手低拒賣盤

保頓由2006年起持續錄得虧損，現球隊債務近1.6億鎊（約19.8億港元），班主艾迪戴維斯舊年12月公開講過，如果有買家出啱價錢，隨時可以賣。早幾日就有泰國傳媒爆出，有泰國財團想以4,000萬鎊（約4.96億港元）收購保頓，不過，保頓高層就否認，仲話有幾個買家一路都有興趣，但泰國財團唔係佢哋杯茶，睇嚟可能係因為對方出手太低啩。

保頓想賣好價，球隊成績好緊要，依家排緊英冠尾二，好難提高叫價，所以領隊連儂要做嘅，就梗係贏多幾場，起碼冇降班壓力，令會方同準買家有得傾。周中快車保頓對卡迪夫城，卡城自從炒咗蘇斯克查之後，成績有好轉，但作客始終唔掂，近五次作客三和兩負未贏過，相反保頓依家聯賽11分當中，有8分喺主場取得，今場都應該手到拿來，平手盤要撐。