辛尼特打爆「藥煲」利華

猪拉多纳

周二歐聯早場，俄超「一哥」辛尼特主場迎戰德甲利華古遜。綽號「藥廠」嘅利華，雖暫列C組榜首，可惜受到魔鬼賽程折磨，更慘到由「藥廠」變成「藥煲」，中後場成堆唔踢得，今場造訪俄羅斯信唔過，辛尼特讓平半，要2.03倍「上盤」！

（有線61、64、201及203、中央5台周三凌晨1:00直播）

利華喺上輪歐聯擊敗辛尼特後，雖然食住個勢喺德甲砌低埋史浩克，不過惡啃賽程嘅影響逐漸浮現，上周中德盃作客非聯賽球隊馬格德堡，竟然踢足120分鐘至靠射贏12碼晉級，孫興民仲做埋「紅牌阿姑」，繼而聯賽造訪今季演出頹爆嘅漢堡，最後亦輸波而回。今晚更要遠征俄羅斯出戰歐聯，連續踢咁多場作客硬仗，真係想唔腳軟都難。
中後場傷兵滿營

最弊係「藥廠」利華古遜變「藥煲」，除咗中場猛將卡斯特羅同路菲斯齊齊養傷，首循環踢足全場嘅防守中場連拿迪斯，日前接受眼部手術後要抖到出年，至於拿斯賓達同奧馬托柏克一對中後場核心，就分別因為腦震盪同感冒未必踢得，加埋件左閘雲達爾拿斯文圖坐波監，主帥羅渣舒密特齋諗點排陣都有排煩，更莫講話要終結近6場作客3和3負嘅劣勢！
查維加西亞弗爆

相比利華中場傷兵成籮，辛尼特防中查維加西亞就弗到漏，日前喺俄超鬥莫斯科中央陸軍一箭定江山助球隊贏波。再者，上屆歐聯以破紀錄新低6分躋身16強嘅辛尼特，今屆都幾難再有呢支歌仔唱，今晚主場迎戰「藥煲」利華，侯克、荷西朗頓、基沙哥夫、韋素等主將落到場勢必搏盡搶分，小讓平半濕濕碎啦！
歐聯C組