羅馬鐵桶陣氹老「細」

猪拉多纳

拜仁慕尼黑今晚喺歐聯主場再遇羅馬，入球大細中位數開到3.5球，不如扒逆水玩1.68倍入球細，事關羅馬首循環喺主場以1:7慘敗，激到教練魯迪加西亞發晒火，所以佢決定收起隊長托迪玩鐵桶陣，免得再輸鑊甘，令專程去德國捧場嘅美國老細冇癮！

（有線62及202、中央5台周四凌晨3:45直播）
拜仁搓多過射

羅馬主帥魯迪加西亞強調，輸1次唔代表永遠都輸，佢仲話雖然上仗大敗，但今鋪仍然有信心作客慕尼黑搶到分。據講魯帥煲完比賽條片之後，打算將原本嘅3箭頭陣式，改為較保守嘅4-3-1-2，安排3個防中同對方鬥搶，再搵比真歷支援謝雲奴同伊度比爭士哥，隊長托迪就成為犧牲品做後備。為乜咁大陣仗？因為羅馬嘅美國老細派路達，約埋佢啲生意合夥人去德國睇波，魯迪加西亞梗係要諗計啦，就算輸都唔好輸得咁肉酸嘛！

對家拜仁3戰全勝坐住榜首位置，今場開W就可以提早出線，好有可能咧住1粒就慢慢踢，而且家陣嘅拜仁搓多過射，其實唔容易出現大手交易，今鋪不如博羅馬輸少當贏，開入球細仲好啦！