帝豪龍駒2W在手

不死鸟

告東尼馬房的「帝豪龍駒」（上圖）上季10戰只得冠亞季各一，睇賽績表現不差，但與練者告東尼對3歲馬連番出擊爭取連捷有不同之處，而他對「帝豪龍駒」有不同部署，當然有其理由，筆者相信係此駒較慢熱兼唔係途短馬，所以才有此做法。
「帝豪龍駒」第2次上陣谷草1200米已得亞軍，第6仗在田草1200米便能輕勝，可見質素及實力有保證。再睇番此兩役取得1冠1亞的跑法，馬兒跑到中段後才見有加速力，到尾段才撻得着後上取勝及入位，不似匹有速度的短途材料。
以告東尼這位豐富經驗練馬師，無可能唔知道「帝豪龍駒」是匹長途血統，因其父Val Royal曾勝1600至2000米，加上母系亦有長力支持，贏完1200米仍繼續跑1200米，他目的只係給此匹長途材增加多些出賽經驗而已，好讓馬兒日後再成熟點，將來增程時便可展示威力。
筆者有這個諗法，就係在上季煞科戰得到啟示，他安排「帝豪龍駒」首次跑1400米，到直路最後200米，牠以勁勢撲前追入第三名，而牠賽前操練沒有特別加強，好明顯係之前跑短途以戰養戰保持到勇態所為。以「帝豪龍駒」質素及實力絕對可以在3班企穩，目前評57分居4班大為着數，來季踏入4歲必有進步，長優於短佳駟，出爭1400米以上途程，必可交出兩至三場頭馬。