返地頭踢高一班波 哈化1.79倍主勝攞「威」

猪拉多纳

周五德甲獨腳戲，哈化柏林會喺主場恭候漢諾威，哈化排喺聯賽榜中下游全因作客踢得差，好在佢哋每逢返到主場例牌踢高一班波，而且沙洛文卡勞最近狀態弗到漏，進攻好手賓哈迪拉亦傷愈復出，要砌低「作客蟲」漢諾威話咁易，一於揀1.79倍主勝。

（有線61及201周六凌晨3:30直播）
賓哈迪拉傷愈候命

哈化近6場聯賽贏輸單跳，當中主場贏晒、作客全敗，證明佢哋喺地頭出戰特別醒神。哈化聯賽主場近3場Win晒，頭號功臣非箭頭沙洛文卡勞莫屬，佢喺其中兩場斬獲3球，就算日前作客柏達邦輸波都有1球進帳，表現着晒火，加埋上輪主場梅開二度嘅翼鋒賓哈迪拉，亦都擺脫大腿肌肉傷患再度候命，哈化前線火力靠得住。
漢諾威作客曳到爆

客軍漢諾威雖然喺德甲連贏兩場，但上場擊敗法蘭克福全靠對手烏龍送禮之餘，另一場對手更係今季聯賽演出曳爆嘅多蒙特，實際表現並非想像中咁標青。再者佢哋作客曳到爆，撇除撼贏「蜜蜂兵」一役，其餘4場1和3負兼夾冇入波，上月底德國盃造訪乙組墊底嘅阿倫更淨吞兩蛋出局，今場即使有中場古斯林刑滿復出，怕且亦難逃輸波命運。