紅軍頹爆難煞車

猪拉多纳

謝拉特巴神冇腳好波

提起利物浦對車路士，球迷大多數都會諗起上季謝拉特嘅「世紀跣腳」跣走咗個英超冠軍，利迷講起都會「唉唉聲」，當事人更係不堪回首。今晚紅軍又喺主場迎戰車仔，但兩軍今非昔比，上季強勢嘅利物浦依家苦苦掙扎，仲未搵到贏波方程式，車路士則喺英超獨領群雄，今場紅軍受讓都咪制，車仔讓平半，捧上盤啱數！

（now 621周六晚8時45分直播）

連最憎利物浦嘅曼聯傳奇領隊費格遜，都承認紅軍係上季英超最佳球隊，咁就證明利物浦上季真係好癲，但弗成咁嘅紅軍上季兩對車仔都輸波而回，包括下半季11連勝強勢正正斷喺車仔手上，就知道羅渣士仲未超越到師傅莫連奴。今季紅軍咁頹，對住順風順水嘅車仔，就更加冇可能一報上季兩敗之仇。
車仔留晒力 魔獸伺機搶

紅軍同車仔喺周中歐聯都係派副選上陣，為今場大戰留力，不過收起謝拉特、史達寧、巴洛迪利等7大主力嘅紅軍，唔代表今場就可以頂到車仔，紅軍依家攻守都有唔少問題，冇咗上季兩把尖刀蘇亞雷斯同史杜列治，攻力即刻大跌幾個「呢」：史達寧畀人睇穿晒、菲臘比古天奴狀態飄忽，踢單箭頭嘅「巴神」明顯同隊波唔夾，淨係識浪射；防中搵回晒塘嘅謝拉特踢就等於冇防中，防線極易受壓，貴價加盟嘅中堅洛夫雲亦唔穩陣，成日走甩人……種種問題並唔係話留力一場歐聯就可以解決到。

相反車仔周中正選陣容收起迪亞高哥斯達、奧斯卡杜斯山度士等主力就真係有用，佢哋養精蓄銳踢今場，紅軍堅有難！其實以紅軍嘅弱雞防守，要頂住夏薩特、法比加斯、「迪哥」呢幾個一等一攻擊手已經好難，加上車仔後備仲有個杜奧巴，「魔獸」以往對住紅軍都入唔少波，佢後備落場分分鐘都數到胡。莫連奴上月贏唔到師傅尹戈爾帶領嘅曼聯，今晚對住徒弟仔羅渣士梗係要威番鋪啦，何況喺歐聯贏唔到弱隊馬里博爾咁激氣，更要班「車手」醒醒定定，贏呢場出番啖氣！