松本風流波捧唔過

猪拉多纳

剩番3輪賽事，日乙已經形勢大定，湘南比馬、松本山雅確認升班，富山勝利就降落日丙，家陣係得升班附加賽席位爭奪有啲意義。正因為咁，來季踢日職嘅松本，今日主場對住第5位嘅千葉市原未必會去盡，讓波更加唔着數，都係博千葉1.75倍下盤划算啲。

松本上星期作客打低黃蜂，篤定以日乙亞軍身份升班，成班波勁興奮，呢幾日主要籌劃緊升上日職之後點搞，仲同監督反町康治續埋約，前日本國腳後衞田中隼磨又專登去咗3年前猝死嘅松田直樹墳前，向呢位故友報告呢個好消息，全隊都好似收夠籌咁。

唔知係咪搏咗成季殘咗，田中隼磨確診右膝半月板破裂，至少休息3、4個月，要搵飯尾龍太朗頂上，松本今季能夠升班，好大程度上係靠防守，39戰失31球，係日乙第2佳，田中突然打柴，對松本不無影響。
千葉博升班附加賽

依家排第5嘅千葉，同磐田、北九州、大分甚至山形都爭緊躋身前6名，希望入到升班附加賽，不過佢哋嘅分差好近，千葉今日至少要攞1分至掂，雖然話松本主場對戰往績未輸過，但係今次時勢唔同咗，千葉係焗住死砌嘅一隊，佢哋受讓平半，絕對可以秤先。
（日）4 松本山雅 Vs 千葉市原