弗爆阿聯追打水手

猪拉多纳

４強上演全澳職對決

今日澳足盃四強上演全澳職對決，阿德萊德聯主場硬撼中岸水手，「阿聯」今季弗到漏油，開咧後未嘗一敗，喺前傑志主帥甘巴爾帶領下表現四平八穩，相反水手連輸三場陷於低潮，近兩次作客阿德萊德聯更慘吞六蛋，識揀一定揀阿軍主勝。

（有線64及203台周三下午4時30分直播）

論聯賽排名，「四哥」阿德萊德聯甩開排第七嘅中岸水手成八分咁多，前傑志教頭甘巴爾經過一季嘅磨合後，其技術流主攻戰術與防守問題逐漸取得平衡，特別係射手摩拉利斯紐曼離隊後都冇乜影響，今季開咧後連盃賽八仗未輸過之外，只失四粒證明防線大有進步。雖然「阿聯」今場續有前鋒迪捷特因傷缺陣，好彩仲有沙治奧施里奧撐住，呢位西班牙兵無論串連進攻定臨門一腳都交足貨，上圈淘汰FC悉尼更先開紀錄，演出一啲都唔失禮，加上中場有佢同鄉伊沙亞斯穿針引線，相信呢對「鬥牛孖寶」會為水手帶嚟唔少麻煩。
水手三連敗 對賽輸蝕

另邊廂中岸水手能夠殺入準決賽，只因上兩圈對住奧林匹克FC同棕櫚灘鯊魚等低組別球隊，不宜高估，該隊啱啱經歷聯賽三連敗，狀態曳到冇朋友，今仗仲有後衞賓特格菲斯倦勤添。睇番佢哋近兩次造訪阿德萊德聯合共輸六粒，真係未踢已經腳軟，況且阿德萊德聯主場堅勁，跨季十四場主場正式比賽未嘗敗績，當中仲贏咗九場，可乘勢踩住沉到爆嘅水手殺入決賽，主勝有1.5倍乃穩陣之選。