羅比堅尼寶刀未老 再帶愛爾蘭歎私房菜

猪拉多纳

歐國盃外圍賽「射手之王」羅比堅尼寶刀未老，喺D組率領愛爾蘭作客對蘇格蘭。34歲嘅羅比堅尼未言退，上月更打破歐國盃外圍賽入波紀錄，有心有力，勢必繼續撰寫新里程碑。有呢位精神領袖助陣，加上愛爾蘭已保持逾半世紀作客蘇格蘭不敗嘅靚績，受讓平半，下盤實在抵玩。

（有線61及201台周六凌晨3時45分直播）
53年來作客蘇格蘭未輸過

愛爾蘭上月大炒直布羅陀7比0，羅比堅尼大演帽子戲法，喺歐國盃外圍賽史上累積21球，超越土耳其名將哈根蘇古，成為首席射手。不過計埋決賽周入球，羅比堅尼仍落後哈根蘇古1球，羅比堅尼仲有鬥心要改寫歷史。羅比堅尼最大心願，始終係助愛爾蘭進身決賽周，佢哋上屆決賽周分組賽3戰全敗，羅比堅尼食白果，今屆好可能係佢最後1次機會喺國際大舞台獻技，肯定搏老命。

事實上，愛爾蘭今次外圍賽表現不俗，上輪作客逼和世界盃冠軍德國，去蘇格蘭比賽更加未驚過。因為愛軍自1961年後，作客未輸過畀蘇格蘭，好似佢哋先至係「東道主」。雙方3年前熱身賽交手，愛爾蘭正係憑羅比堅尼一箭定江山擊敗蘇格蘭。 蘇格蘭人才凋零，靠晒新特蘭前鋒史提芬費查及愛華頓前鋒賴史密夫搵食，但兩人喺國家隊表現一向麻麻，史提芬費查17次披甲僅入1球，賴史密夫32次上陣入得4球咁大把。球隊缺乏數胡人物，根本冇本錢讓波。