葡軍攻到「美」演入球騷

猪拉多纳

C朗造勢回歸奧脫福

歐國盃外圍賽今晚重燃戰火，近排攞獎攞到手軟嘅C朗，將帶領葡萄牙主場迎戰I組對手阿美尼亞。呢位皇馬王牌開季至今入球停不了，何況嚟緊佢仲要重返奧脫福球場，同死敵美斯領軍嘅阿根廷踢熱身賽，今場梗係要入多2粒省靚招牌，1.59倍入球大咪錯過。

（有線62及202、中央5台周六凌晨3:45直播）

葡萄牙首戰主場爆冷輸畀阿爾巴尼亞0:1，賽後主帥保羅賓圖辭職，改由新帥費蘭度山度士上任。但其實邊個執教鞭都好，至緊要C朗交到功課，上輪比賽佢哋憑住C朗喺補時階段建功，作客以1:0小勝丹麥打開勝利之門，總算令葡軍鬆一口氣。
葡萄牙干查奧缺陣

事實上C朗今季Fit到爆，至今喪入24粒，最近又連拎歐洲金靴獎、由《馬卡報》頒發嘅西甲最佳球員獎同最佳射手獎，人氣爆燈。偏偏有消息指下周二佢同美斯嘅世紀對決竟出現門票滯銷問題，暫時只賣出20%門票。須知奧脫福球場對C朗意義非凡，今晚佢當然想延續自己嘅「士哥」潮，等下場有多啲球迷入場打氣嘛！

不過葡軍後防唔係冇隱憂，左閘法比奧干查奧缺陣，新兵泰亞高高美斯同拉菲爾古里路兩個默契同實力始終有差距，加上球隊重召已過巔峰嘅老將卡維奴、保辛華入伍，咁搞法容乜易愈幫愈忙。
阿美尼亞作客勁失波

講防線對手阿美尼亞同樣唔掂，近7場作客喪失17粒，好在重召咗莫斯科斯巴達前鋒摩域斯恩、多蒙德中場米希達利恩等主力入選，總算令攻力有番啲起色。既然佢哋早前對住德國同丹麥都可以偷雞入番粒，對住唔算穩陣嘅葡萄牙防線應該唔愁冇餐士。
盤路解碼

葡萄牙今年10戰開出6口入球大，比率達60%。
Data King：阿美尼亞連續7場作客失波

‧葡萄牙歷來4次對阿美尼亞未輸過，主場更係2戰全勝。

‧C朗今季喺各項正式比賽入咗24球。

‧阿美尼亞連續7場作客失波，當中6次至少失2球。
乜都玩錦囊：阿美豆腐防線追「讓主」

有C朗在陣嘅葡萄牙，攻擊力即以幾何級數上升，加上拿尼重返葡超後表現有起色，梗係夠料射爆阿美尼亞條豆腐防線。況且阿美尼亞每逢作客例必腳軟，佢哋近7場作客有成6場至少失2球，撞正大勇嘅C朗幾難守得住，一於追埋1.52倍「讓主」。