西班牙炒起白俄羅斯

猪拉多纳

改打雙箭頭提升火力！

歐國外C組今晚有好戲睇，西班牙C組喺主場對白俄羅斯，「-2」不妨照揀1.95倍「讓球主勝」，因為西班牙教頭迪保斯基棄用犯眾憎嘅迪亞高哥斯達後，全隊可能反而更加團結，而且佢打算變陣打雙箭頭，擺大個頭梗係想炒起對手啦！

（有線61、201及中央5台周日凌晨3:45直播）
迪哥詐傷唔歸隊

其實西班牙陣中嘅大佬級球員，一向唔歡迎巴西出生嘅迪亞高哥斯達，或者因為大家都唔想交波畀佢，迪哥加入西班牙國家隊後，完全踢唔出喺球會水準，呢場佢聽車路士領隊莫連奴支笛唔玩，連歸隊體測詐傷呢招都出埋，咁樣仲可能會激起其他西班牙國腳嘅鬥心，證明冇佢更加掂。
莫拉達夥拍艾卡沙攻堅

唔只咁，消息話西班牙教頭迪保斯基會放棄無鋒陣同單箭頭陣式，將會安排首次入選已經着10號嘅祖雲達斯前鋒艾華路莫拉達，拍住華倫西亞射手柏高艾卡沙爭取入波，尤其是鍾意歎慢板嘅中場恩尼斯達、法比加斯同大衞施華因傷避戰，好彩有鎮守後防嘅大佬沙治奧拉莫斯係度，班後生仔可能踢得更爽添！

現時西班牙喺分組賽得2勝1負，對手白俄羅斯得1和2負，心態上當然想搶分，但佢哋啲所謂外流球員，多數喺俄羅斯落班，踢過巴塞隆拿嘅高耶中場希比，過晒氣最近已經冇入選，何況兩年前佢哋喺世盃外對西班牙，2戰全敗失6球，睇怕呢場都頂唔住。