-2冇有怕 荷蘭讓主有作維

猪拉多纳

希丁克豪言再輸即辭職

荷蘭教頭希丁克上任後接連輸波飽受壓力，今晚喺歐國盃外圍賽A組主場迎戰拉脫維亞之前，希帥就許下「再輸就辭職」承諾，相信可以辣起一班球星心中嗰團火做番齣好戲，-2都撐「讓主」！

（有線61、201及中央5台周一凌晨1:00直播）

喺世盃攞咗季軍後，「橙帥」尹戈爾即轉飯鑊去教曼聯賺英鎊，荷蘭搵嚟希丁克領軍自然令人期待。可惜佢接手後連熱身賽5戰只得1勝4負，當中歐國盃外圍賽踢3場輸2場，對住捷克同冰島呢啲二線國家隊都「唔夠揪」，希丁克當然畀人插到萬箭穿心。
拉脫維亞外圍賽3戰不勝

咁都未算慘，上周中荷蘭喺熱身賽主場2:3輸埋畀墨西哥，可以想像到「橙軍」上下家陣壓力有幾大，不過勢估唔到希丁克喺今仗賽前挺身而出一力承擔：「如果今場再輸，我就會辭職！」事實上荷蘭今次點兵精銳盡出，尹佩斯、洛賓、史奈達同亨特拉爾等主力繼續壓陣，守將華亞爾傷愈亦獲重召，主場出擊自然信心十足。

相比起荷蘭星光熠熠，客軍拉脫維亞自然未夠班，睇番佢哋能夠响歐洲主流聯賽搵食嘅球員都冇幾個，今次亦只得効力漢堡嘅前鋒魯特尼夫斯叫做有多少睇頭。呢支三線歐洲兵喺分組賽3戰不勝，之前作客對住弱旅哈薩克都只係悶和0:0，今場去到荷蘭主場肯定冇運行，相信想輸少粒都難！
歐國外A組：頂「占」推介：荷蘭（讓球主勝）