「歐洲紅魔」主場夠氣勢 撐比利時贏兩粒攞「威」

猪拉多纳

威爾斯家陣排喺歐國盃外圍賽B組榜首，今輪作客比利時將面臨真正考驗。論名氣，威爾斯雖有加里夫巴利、艾朗藍斯等球星孭飛，但拍埋「歐洲紅魔」比利時度，整體實力始終較輸蝕，而且佔地利嘅比利時近3場主場全部贏晒，捧1.68倍嘅「讓球主勝」點都着數啲！

（有線64及203周一凌晨1:00直播）
威爾斯係「有限公司」

經過3輪分組賽之後，威爾斯暫以2勝1和得7分喺B組做緊「一哥」，不過睇真啲賽績，佢哋贏安道爾同塞浦路斯兩場波，雖然都唔算係齊晒腳「夫添」出擊，但對手出晒名「魚腩」都只係僅贏2:1，就知威爾斯實力都只係「有限公司」。始終呢支國家隊都係靠晒加里夫巴利、艾朗藍斯同祖阿倫3星，是但一件失準嘅話，成隊波嘅表現可以差好遠。況且佢哋進攻點唔多，對住防守尚算穩健嘅比利時，「大聖爺」要攻破泰拔高圖爾斯把守嘅大門唔係易事。

主隊比利時今戰人腳都算完整，只得隊長高柏尼小腿有傷掛免戰牌。睇番「歐洲紅魔」陣容，中、前線猛人多到凸晒章，就算係曼聯中場費蘭尼都唔係必然正選。人強馬壯兼且喺主場出擊，睇嚟威爾斯個榜首位置都唔係咁穩陣咯！