阿葡大戰紅魔開Party

猪拉多纳

美斯C朗西甲鬥到奧脫福

美斯同C朗由西甲鬥到國際舞台，今晚喺奧脫福球場熱身賽阿根廷對葡萄牙，兩位超級射手再一次大鬥法。美斯近年畀C朗搶晒風頭，但勝在國家隊有一班隊友個個有卡士，阿古路、迪馬利亞依家都弗爆，足以撕開葡國防線，為美斯出番啖氣。C朗當然不甘示弱，佢重返成名地，勢必受紅魔粉絲支持。而兩軍陣中好多主將都同曼聯有淵源，令今仗有如紅魔派對，眾星實會落力數胡娛賓，大盤可期。

（TVB301周三凌晨3時45分直播）
新知舊雨濟濟一堂

今場重頭戲安排喺奧脫福球場舉行，的確非常正確，單單係曼聯前「7號仔」C朗回歸，已經肯定係票房保證。呢位皇馬神鋒為曼聯奪得英超及歐聯等冠軍，佢早前更透露將來可能重返曼聯効力。紅魔近兩季成績低迷，球迷更想C朗返嚟救亡，今仗必定熱情歡迎佢，令C朗有回家溫暖感覺，希望打動佢回巢。相信C朗亦會識做，起碼都要入波「回禮」，尤其係遇上宿敵美斯，「主場」出擊下更加冇理由失威。

美斯近兩季入波數字有下降趨勢，但佢嘅級數仍屬世界首屈一指，佢喺國家隊經常作出美妙傳送，為隊友創造入波機會。阿古路、迪馬利亞，以至後備席上嘅希古恩、泰維斯皆具備上乘射術，可以分擔美斯入波負責。其中迪馬利亞喺自己地頭踢波，亦要喺C朗面前證明自己有資格孭起件紅魔7號戰衣，至於泰維斯喺奧脫福曾經同C朗合作，亦有過一段威水日子，今日故劍重逢，如有機會上陣，相信亦絕不會欺場。
阿根廷往績一面倒

葡萄牙方面亦有被曼聯「放逐」到士砵亭嘅翼鋒拿尼在陣，因此佢肯定要打爭氣波，全力輔助C朗攻堅，以證明紅魔將佢外借係錯誤決定。事實上，阿根廷整體人腳實力確實凌駕葡萄牙，雙方史上7次交鋒，阿根廷獲得5勝1和1負一面倒戰績，包括3年前贏2比1，當時迪馬利亞為阿根廷打開紀錄，C朗入波扳平，美斯射入致勝12碼，戰況激烈，因此今仗令人期望佢哋再演入球騷，一於博大盤。