白俄衰到震粉絲都唔撐

猪拉多纳

今晚國際賽雖然全部都係熱身賽，但只要肯做工夫，一樣可以搵到好嘢，世界排名106嘅白俄羅斯主場迎戰17位嘅墨西哥，兩軍實力同狀態一天一地；白俄近況奇差，領隊辭職後仲未搵到人接手，球隊陣容又嚴重不整，今場波連主隊球迷都唔願意捧場，根本冇得同弗到震嘅墨西哥鍊，客Ｗ可視為全日重心。

（周三凌晨1時開賽）

白俄羅斯今屆歐國盃外圍賽開得極曳，除首仗賽和魚腩部隊盧森堡外，跟住三戰皆北，上月中主場不敵斯洛伐克後，執教球隊三年嘅領隊干佐亞迪夫宣布辭職，足總仲未搵到新領隊人選，上周末作客西班牙要由原來副領隊塞文杜域治暫掌帥印，結果慘吞三蛋而回。原本輸畀西班牙都預咗，但白俄傳媒同球迷都對塞文杜域治嘅選人表示強烈不滿，皆因佢棄用咗中場兩大主力，原隊長希利比同喺白俄出生嘅巴西裔領軍人物比斯辛；至於主力箭頭路迪安諾夫、兩大正選中堅費立彭高同波利欣高夫就因傷缺陣；更不幸嘅係另一中堅馬泰魯域治和中場巴蘭諾域治都喺對西班牙一役受傷，今晚無緣披甲，超過半隊主力球員唔出得，令球隊戰鬥力弱上加弱。
墨西哥弗爆追多鋪

墨西哥除咗實力高幾班，球隊狀態亦弗到爆，近四場熱身賽全勝，包括上周四凌晨作客擊敗荷蘭，報卻世盃決賽周敗辱。領隊靴里拉選人亦夠誠意，保留咗大部分世盃骨幹，當中對荷蘭建功嘅查維亞靴南迪斯同卡路士韋拿都勇得交關，今晚乘勝追擊，當然要延續連勝強勢。事實上連白俄球迷都冇興趣捧自己球隊，門票銷情極之冷淡，似乎都預咗唔夠墨西哥砌。