ＰＳＧ客戰梅斯吹細風

猪拉多纳

伊巴剛傷愈 卡雲尼攰爆

歐洲各大聯賽今晚重燃戰火，阿King就睇中法甲獨腳戲，由梅斯主場迎戰巴黎聖日耳門（ＰＳＧ），後者王牌伊巴謙莫域好番冇耐，另一箭頭卡雲尼啱啱踢完國際賽未必出場，火力大減，面對硬淨嘅梅斯難佔甜頭，客勝太熱冇肉食，轉玩入球細好過。

（TVB 302周六凌晨3時30分直播）

前日係ＰＳＧ主帥白蘭斯49歲牛一，佢梗係希望一眾踢完國際賽嘅球員冇傷冇病，好似之前抖咗七周嘅伊巴謙莫域，喺上周六為瑞典於歐國外打和黑山後，為安全起見，連周中熱身賽對法國都冇踢拿拿臨返巴黎，畢竟伊巴年紀唔細，下周中又要喺歐聯主場出戰阿積士，呢位瑞典隊長就算上陣都會就住嚟踢。至於另一箭頭卡雲尼，啱啱周三朝早先為烏拉圭作客「拍跳」智利打咗80分鐘，舟車勞頓攰到爆，兩大神鋒各有問題，令ＰＳＧ前線火力大減，撞正今季主場未輸過嘅梅斯，客勝得1.34倍冇肉食，寧捧1.82倍嘅細盤。
獅吼瞓醒陸續有嚟

至於下晝開波嘅澳職，上季總冠軍布里斯班獅吼終於「瞓醒」，上仗大炒紐卡素噴射機4蛋，打開今季勝利之門。獅吼呢班波本身有質素，依家打破心理樽頸位，好波應該陸續有嚟，今輪作客墨爾本勝利，趁獅吼仲有得受讓，力撐讓球客勝。（有線64及203台周五下午4時40分直播）最後智甲安圖法加斯達主場對哥比路亞，前者箭頭奧士文靴亞達刑滿復出，面對近六作客輸五仗嘅哥比路亞，小讓平半敲上盤。