米蘭打吡 文仙尼回巢救國

猪拉多纳

意甲米蘭打吡，AC米蘭主場對國際米蘭，文仙尼回巢救「國」！國際米蘭早前炒教練馬沙利，聘請昔日「三冠主帥」文仙尼領軍，的確令人有憧憬。文帥對國米能力瞭若指掌，已迅速制訂新戰術，計劃變陣出擊，「晒冷」排出更具侵略性嘅4312陣式，以阿根廷裔「鐵三角」插向對手，力爭打響頭炮。AC米蘭防線傷停問題嚴重，恐怕抵擋唔住文仙尼「三把火」，國際米蘭平手盤值博。

（TVB301周一凌晨3時45分直播）

雖然文仙尼近年執教曼城及加拉塔沙雷，表現都備受批評，但畢竟曾率領國米3次奪得聯賽冠軍，意甲競爭力低，以文帥級數應付仍綽綽有餘。最重要係「回家」冇適應問題，相信可以迅速幫國米搵出問題所在，加以解決，呢點肯定係老闆托希爾請佢執教嘅主因。

據悉文仙尼已有復興大計，包括將馬沙利慣用嘅352陣式，改為4312，會將前鋒柏拉斯奧拖後，轉任進攻中場，夥拍同屬阿根廷裔嘅奧斯華度、莫路伊卡迪攻堅，有助提升火力。莫路伊卡迪近5場比賽，轟入4球，腳風非常順。文仙尼回巢首仗，當然想做齣好戲，向托希爾交代。
AC傷停問題嚴重

AC米蘭今季整體表現冇乜起色，本來防線已經唔穩，依家仲要人腳不整。右閘阿比迪、中堅阿歷士洛里高、防中尼祖迪莊都因傷倦勤，邦利拿停賽，令情況雪上加霜。近6次米蘭打吡，AC僅1勝1和4負，加上教練恩沙基經驗唔及文仙尼，唔係國米對手。