水晶宮 讓主 有本有利

猪拉多纳

「史獨」有排抖 紅軍啞火黑到痹

利物浦今季多災多難，以1,600萬鎊由AC米蘭簽入嘅巴洛迪利完全唔對辦，根本取代唔到蘇亞雷斯離隊嘅空缺，最濕滯係另一射手史杜列治又再受傷，而且嚟緊周中仲要踢歐聯分組賽，今晚喺英超造訪水晶宮未必會搏到盡，作客讓波梗係撐1.96倍嘅「讓球主勝」啦！

（now621台周日晚9:30直播）

巴洛迪利嚟咗「紅軍」咁耐仲未喺英超開齋，另一名新兵列基林拔亦只係得個衝字，最弊係史杜列治觸傷舊患要到明年先可以復出，搞到領隊羅渣士發晒茅，話要搵軍醫研究「史獨」隻小腿點解會咁易傷，又游說會方盡快回收「新魔獸」奧歷治返嚟。不過「紅軍」咁都未算最黑，轉頭又有副隊長佐敦軒達臣腿筋受傷，需知道佢哋要喺周四凌晨歐聯造訪盧多格德斯，羅渣士今鋪會唔會冒險派「軒仔」落場係一大疑問。
積甸拿克刑滿守力增

連埋歐聯在內，利物浦最近連續輸咗3場，雖然今仗對手水晶宮近況一樣咁曳，連續5場英超失分，不過佢哋對住車路士都係僅輸1:2，上輪造訪奧脫福鬥曼聯亦只係輸0:1，冇畀人炒算有晒交代。水晶宮今仗有積甸拿克刑滿復出，防守力大大加強，領隊禾諾克前晚話對住利物浦要攻守平衡，除咗落定「柯打」專攻「紅軍」二閘之外，又話會搵轉咗型嘅查馬克看管謝拉特，聽落一早有晒部署咁款喎！

有印象嘅球迷應該記得利物浦上季尾二嗰輪英超，晨早就領先水晶宮3粒，但最終被逼和3:3收場，家陣「紅軍」咁頹，Yennie唔排除歷史又會重演囉！
盤路解碼

水晶宮今季主場6戰開出1單5雙。
Data King：水晶宮近5次主場對賽不敗

‧水晶宮近5次主場鬥利物浦取得3勝2和。

‧「紅軍」今季7場作客輸5場。

‧雙方近5次對碰開出4大1細。
乜都玩錦囊：後防開窿吼1.82倍大

利物浦近9場英超作客勁失18球，水晶宮連續5場聯賽有失波，加上兩軍近5次交手有4場開大，除咗「讓主」之外，1.82倍入球大亦抵玩！