修咸頓又想散貨

猪拉多纳

約維拉做大騷抬身價

今晚英超獨腳戲阿士東維拉喺主場對修咸頓，玩入球大着數。最近維拉麻煩事多到數唔晒，就連領隊林拔都開始失控鬧人，撞啱修咸頓準備喺轉會市場散貨搵錢，梗係要入多啲波，抬高陣中球星嘅價錢啦，揀2.05倍入球大最實際！

（now621台周二凌晨4:00直播）

維拉月初喺主場1:2不敵熱刺，兩隊球員幾乎開大片，結果分別被英格蘭足總罰款2萬鎊，原本佢哋嘅走勢已經勁差，家陣士氣難免直插谷底。仲有呀，中堅辛德路斯據講未好番，呢場唔使預佢，最近維拉好似黃大仙咁款，對上7場有6場至少失2球，邊似有本事保持清白呀？
華亞爾經理人 教唆離巢激嬲領隊

咁都唔止，近日維拉領隊林拔喪鬧隊長華亞爾嘅經理人，埋怨對方教唆呢位中堅轉會曼聯或者阿仙奴，周街鬧簡直輸到傻咗咁，睇怕只會搞到隊波踢得更加亂，連後防支柱都冇鬥心，點睇維拉都唔似守得住，恐怕只能夠疊埋心水同「聖人」搏錘。咪睇修咸頓今季失得5球波咁少，查實其中有4球係作客失球，所以安祖斯韋文同艾邦拉荷兩位射手隨時可以做番齣好戲o架！
聖人等錢使 冬季轉會窗又賣人

另一方面，修咸頓喺新領隊朗奴高文帶領下，意想不到地身處聯賽榜第2位，不過佢哋嘅高層向來賺錢至上，開季前賣走射手列基林拔、翼鋒拉爾拉拿同左閘勞基梳爾後，近排又放風考慮賣射手加斯安奴柏利及中場舒尼達連兩個進攻主力， 如果想嗌高啲價錢，梗係要谷佢哋入多啲波，玩大佢冇錯。