史浩克砌車迪馬堤奧大報復

猪拉多纳

德甲史浩克04將會於歐聯G組主場鬥車路士，主帥迪馬堤奧倒戈誓打爭氣波！雖然車仔位於G組榜首，但並非出梗線，呢場大戰兩邊都肯定想全取3分，唔會退讓，尤其迪馬堤奧當年幫車路士勇奪歐聯冠軍，但唔夠半年就慘食無情雞，如今場贏波肯定吐氣揚眉，兩邊鬥攻勢演入球騷。

(有線64及203台周三凌晨3時45分直播)

分組賽首回合比數係1比1，但雙方共炮製32次射門，22次中龍，而當日兩軍門將泰拔高圖爾斯及費文都有水準表現，作出唔少精彩撲救，否則入波點止兩粒咁少。

今日兩軍再遇，史浩克換咗教頭由曾於2012年帶領車仔擊敗拜仁捧走歐聯嘅迪馬堤奧領軍，迪馬堤奧於2012年11月被車仔炒魷後，曾拒絕一筆過賠償，要車仔每周支付13萬鎊人工，直到史浩克請佢為止，今仗迪馬堤奧倒戈話題十足，如果贏埋更加順晒條氣，故一定同車仔死過。

至於車路士有前鋒迪亞高哥斯達態勇，連續兩場入波，加上「寸王」莫連奴牙擦性格，作客都唔會死守，鬥攻之下會多波入，捧大最啱數。