禾夫斯堡 愛華頓 射手大鬥法

猪拉多纳

H組榜首爭奪戰！

歐霸盃今晚又直播連場，禾夫斯堡喺主場對愛華頓，屬於H組榜首大戰，玩1.65倍入球大最過癮。最近禾堡前線大爆發，連被稱為「中堅賓」嘅賓特拿都識入波，認真唔講得笑，撞啱對家愛華頓嘅射手盧卡古狀態好轉，領隊馬天尼斯仲撐佢會成為世界最佳前鋒之一，兩軍鬥入波點會悶親大家呀？

（有線61、201及廣東體育周五凌晨2:00直播）
主隊近8仗入26球

禾夫斯堡日前喺德甲作客以2:3不敵史浩克04，結束連盃賽8連勝走勢，但即使係咁，禾堡近8仗轟入26粒，認真唔講得笑，射手奧歷仲已經連續2場入波，中場肯特一樣有料到，就連不受重用嘅中鋒賓特拿，近3場都勁入3球，睇得出全隊信心爆棚，今場主場出戰，當然要入多幾球，搶番H組榜首位置啦！

除此之外，其實中場比列錫同奇雲迪布尼，一樣有強大嘅入球能力，當中奇雲迪布尼踢過英超効力車路士，肯定熟悉愛華頓嘅打法，加上禾夫斯堡近8場有7場開入球大，好似唔入波會唔安樂咁，睇嚟已經做好準備，洗脫首循環作客以1:4慘負愛華頓嘅恥辱。
客軍盧卡古狀態弗爆

現時愛華頓領先狼堡1分，而且連盃賽近7場有4勝3和，期間中鋒盧卡古仲攻入3球添，領隊馬天尼斯更話，佢有朝一日會躋身全球最佳前鋒行列，照計佢會加多兩錢肉緊爭取士哥，就算前鋒賴史密夫受傷未必踢得，佢哋都應該有能力入波。唔好忘記，仲有射手伊度奧等住上呀！

歐霸盃H組