南特守細波頂得住馬賽

猪拉多纳

法甲周六凌晨上演獨腳戲，馬賽主場迎戰南特。馬賽主場六連勝，不過南特今季表現亦好硬淨，聯賽至今不敗率超過八成，而且仲係聯賽失球數字最少嘅球隊，預計今場入波唔會多，建議捧1.72倍細盤。

（TVB 302周六凌晨3時30分直播）

馬賽早前於國家打吡不敵聖日耳門，榜首優勢大減，好彩佢哋冇被打沉，上周返回主場迎戰今季表現復甦嘅波爾多以三比一贏波，主場累積六連勝。
今季失球仲係單位數

不過佢哋今場對手南特並唔好惹，南特開季十四場聯賽六勝六和兩負，係不敗之師聖日耳門以外輸波次數最少嘅球隊，而且佢哋後防僅失九球，係唯一一支法甲球隊失球保持喺單位數，防守力之強可見一斑。睇番南特今季聯賽兩次輸波，分別僅以0比1及0比2不敵摩納哥和里爾，連埋呢兩場，南特今季十四場聯賽有十二場總入球都在兩球或以下，今場最好捧細盤。