曼城唔贏唔修貨

猪拉多纳

熱烈祝賀「Kun神」百戰大典

今晚英超「三哥」曼城作客硬撼次席嘅修咸頓，上周中歐聯憑一己之力帶領「藍月亮」死裏逃生嘅「Kun神」阿古路，迎來個人第100場英超，呢位近期着晒火嘅阿根廷射手，遇上開始腳軟嘅修咸頓，誓要喺這場里程碑之戰盡騷哥利，曼城小讓平半，斯維力撐上盤。

（now 621周日晚9時30分直播）
修咸頓銳氣已洩

阿古路對曼城有幾重要？淨係睇佢上周中歐聯對拜仁大演帽子戲法，包括最後8分鐘嗰救命兩粒協助球隊反勝3比2，重燃出線希望，唔單止喺歐聯威威，佢今季喺12場聯賽入咗12粒，在射手榜排「一哥」，真係弗到冇朋友。之前阿古路已榮膺曼城喺英超史上嘅士哥王，已經正式「封神」。今晚作客修咸頓，就迎來「Kun神」第100場英超，在之前嘅99場波佢總共累積咗64球，喺頭百場英超射手榜中，僅次於舒利亞（79球）及雲尼斯達萊（68球）兩大傳奇前鋒，入球效率極高，喺咁有紀念意義嘅第100戰，阿古路梗係要唔衰得，誓要用士哥領曼城贏波贈興啦！

「聖人」修咸頓季前遭列強煎皮拆骨，主帥朗奴高文在限米煮限飯之下調動得宜，帶隊神奇地殺上第2位，「聖人」都變「勝人」。不過，呢類中型班通常打道氣，道氣一洩隨時會下滑，好似經過國際賽期後，「聖人」上仗對住曾連輸6場嘅維拉，成班波立晒油谷唔起，最終搶番1分都算執身彩。
耶耶復出中場贏晒

最弊係下個月「修頓」要面對魔鬼賽期，接連火併阿仙奴、曼聯、愛華頓同車路士，除咗長期傷兵禾特普斯及積洛迪古斯續抖外，中場核心舒尼達連亦上陣成疑，朗奴高文都咪話唔頭痕。

曼城雖然仍有大衞施華、迪斯高及高拉洛夫因傷倦勤，但於對拜仁之役坐波監嘅防中耶耶托尼及費蘭甸奴抖足成個禮拜，今仗復出定必開行Turbo鬥搶，有埋呢兩位能攻善守嘅悍將，曼城中場贏晒，令阿古路可無後顧之憂於前線「等食」，相信修咸頓好難頂得住，1.92倍上盤實屬不二之選。