曼城踩修頓做大騷

猪拉多纳

柏利 決戰 阿古路

今季英超最大驚喜，相信都係季前大換血嘅修咸頓！「聖人」家陣進佔聯賽榜次席，今晚展開「地獄賽程」第一擊硬撼曼城，能唔能夠繼續神奇好難講，但以加斯安奴柏利為首嘅鋒線火力咁強，曼城亦有入波入到唔曉停嘅阿古路，Yennie梗係捧1.8倍入球大啦！
修咸頓爭勝迎地獄賽程

「聖人」修咸頓開咧至今表現出色，近6仗未輸過，拎到5勝1和佳績，夾埋入咗16球，首席射手加斯安奴柏利頭頂腳踢瓣瓣掂固然犀利，最重要係連雲耶馬同尼達利基尼呢啲中後場球員，都頻頻殺上前場攻埋一份，領隊朗奴高文套戰術係得嘅！

修咸頓嚟緊會迎接「地獄賽程」，今晚硬撼完曼城後，仲有阿仙奴、曼聯、愛華頓同車路士等緊佢哋，朗奴高文賽前話未來場場波都要當決賽咁踢，對住「藍月亮」當然想開靚頭個，喺「地獄賽程」第一擊打起信心，主場出擊唔慌保守。
藍月亮殺「仁」士氣回升

衞冕嘅曼城啱啱喺歐聯分組賽以3:2擊敗拜仁慕尼黑，姑勿論呢支德甲班霸有冇放軟手腳，但呢場勝仗無疑打起番「藍月亮」嘅士氣。當中阿古路更加連中三元，單計11月已經入咗6球，腳風順成咁邊個頂得住佢呀？加埋耶耶托尼、拿斯尼同捷西斯拿華斯3位攻擊好手，即使作客都肯定同你死過。既然主帥比歷連尼口響響話隊波仲有本事後上追趕榜首嘅車仔，今鋪又點會唔同修咸頓對攻搶3分吖，捧大啱數。
盤路解碼

曼城今季英超6場作客5雙1單。
Data King：阿古路12戰勁入14球

‧曼城射手阿古路近12場勁入14球。

‧以2.5球中位數計，雙方近6次交手5場開大。

‧修咸頓今季主場半場從未落後，「半贏」同「半和」各3次。
乜都玩錦囊：交手旺「半大」再追

修咸頓同曼城近年不乏大手交易，近6次交手有5場開大唔在講，其中5場喺上半場已經出現最少兩個入波，今場不妨揀埋2.6倍「半場大」！