巴塞做大騷 賀115年會慶！

猪拉多纳

華倫主場火力勁

今晚西甲華倫西亞喺主場迎戰巴塞隆拿，「蝙蝠兵團」近兩仗不勝，但勝在今季主場出擊火力強勁，絕對有力撕破「地上最強」防線。適逢尋日係巴塞創會115周年，今戰就算作客都想攞3分助興，加埋「球王」美斯近期連環中三元打破西甲、歐聯入球紀錄，1.43倍入球大要趁熱食！

（now632台周一凌晨4:00直播）
華倫周身刀有本錢鬥攻

華倫西亞今季回復強隊本色，暫以24分排喺聯賽榜前列，西甲主場成績更加係冇得頂，6戰過後合共攻入15球，火力真係唔少嘢。柏利祖、柏高艾卡沙一對攻擊組合目前各有4球進帳，最重要係「蝙蝠兵團」中前場入球分布夠晒廣，令人防不勝防，好似菲侯利、皮亞堤、安祖高美斯等都開晒齋，夠晒本錢同巴塞鬥攻。
「南美三叉戟」入波易過食菜

巴塞早前連輸兩場令人大跌眼鏡，聯賽榜首位置亦都拱手讓咗畀皇家馬德里，好在佢哋最近喺聯賽同歐聯戰場強勢反彈連贏3場，士氣同信心明顯返晒嚟，何況恩尼斯達今晚仲有機會復出添！

老實講，最令巴塞躉開心嘅，係「南美三叉戟」終於交到功課，尼馬、美斯同蘇亞雷斯近兩場合力轟入8球，當中「哨牙蘇」亦已經喺上周中歐聯攞到加盟巴塞之後嘅首個正式賽事入波，話唔埋昔日入波當食菜嘅「哨牙蘇」士哥會陸續有嚟。至於「球王」美斯就連續兩仗大演帽子戲法，腳風順成咁，今晚隨時又係佢嘅Show Time。既然兩邊都咁攻得，入波唔成問題啦！
盤路解碼

華倫西亞今季12戰9次開出入球大，比率達75%。