火車頭 斯巴達內訌博半和

猪拉多纳

（日）5 莫斯科火車頭 Vs 莫斯科斯巴達

俄超有成5支莫斯科球隊，「莫斯科打吡」隨時有得睇，今日就有一場嘞，戲碼係第8嘅莫斯科火車頭對第5嘅莫斯科斯巴達，你咪睇佢兩隊唔係三甲分子，實質雙方都係莫斯科打吡專家，呢場同城對碰唔單只易開細，開出2.05倍半場和都唔奇。

（now 671台周日晚6:30直播）

火車頭、斯巴達喺今季嘅莫斯科打吡踢咗4場，火車頭2勝1和1負，斯巴達直頭勁到3勝1和，和嗰場就係3月主場打和火車頭1:1，論打吡戰績，佢兩隊仲威過現今嘅豪門莫斯科戴拿模同莫斯科中央陸軍。

兩雄相遇，今場波會唔會學似火車頭教練保素域咁講，會係一場放開手腳對攻嘅Open Game呢？睇怕就未必，火車頭呢場有後衞維達利丹尼索夫坐波監，頂佢嗰個施舒堅近季坐多過踢，前鋒達美尼耶度又傷愈冇耐，敢唔敢搶攻幾成問題。而且火車頭班人似乎好忌斯巴達個中場大將舒洛哥夫，話要（目及）實唔畀佢搞事，點能夠放手搏殺吖。

最重要係斯巴達上仗主場對摩度維亞，半場領先3:1都差啲畀人追和，雖然最後4:2勝出，不過成班人畀Fans喪插，今日仲敢亂嚟咩。何況Check番幾場打吡數據，開半和嘅比率坐底有50個巴仙，今晚場波又要响零下6度嘅環境開波，熱身都要時間啦，前45分鐘冇交收有乜奇。