般尼當頭起 平手有着素

猪拉多纳

所謂寧買當頭起，季初畀人睇死嘅般尼最近頻頻搶分得手，目前喺英超更正式脫離榜尾位置，隊內士氣高漲，今晚喺主場恭候啱啱畀人打斷度氣嘅紐卡素，平手盤梗係撐1.94倍般尼，至少坐和望贏。

（now625台周三凌晨3:45直播）

般尼早前連勝侯城同史篤城，上個禮拜六亦憑住完場前嘅入波，喺主場逼和阿士東維拉1:1，計落3戰喪搶7分，賽後佢哋亦以1分之差壓過同屬升班球隊嘅李斯特城升上聯賽榜19位，今晚再次主場出擊淨係個勢都夠殺。
紐卡素6連勝強勢剛斷纜

雖然唔敢話般尼最終可以留喺英超，但班波狀態咁好，真係要讚吓球隊兩大功臣，首先係領隊戴治，經過季初摸索後終於搵到入波方程式，由頭7場入1球到近7戰入8球，攻擊力好轉搶分都易啲啦。當然前鋒丹尼艾格斯亦功不可沒，近2場入3球，難怪盛傳今戰對手紐卡素有意喺出年1月轉會窗重開後搶人，呢位英格蘭U21國腳為公為私，今次對住「喜鵲」仲點會留手！

另邊廂嘅紐卡素上場作客輸畀韋斯咸0:1，6連勝氣勢告終。事實上呢類中型班連勝嗰陣係威係勢，當度氣一旦被打斷就冇咁快翻到身，加上主力中場穆沙施素高停賽，中堅高洛仙尼又未知趕唔趕得切復出披甲，今戰都係不宜沾手。