光輝攰爆撐悉尼

猪拉多纳

五日兩作客 遊機河腳都軟

上場先作客完布里斯班獅吼嘅珀斯光輝，今日場澳職又要再遠征FC悉尼，喺舟車勞頓嘅情況下，光輝都係揀唔落手，科娜改捧主勝。

（有線64及203台周四下午4時30分直播）

澳洲一向係工作假期熱門地方，吸引唔少香港年輕人，科娜都好想有機會去體驗外國嘅生活呀！澳洲最多人一邊打工一邊度假嘅城市包括悉尼同珀斯，睇番地圖，原來悉尼同珀斯呢兩個地方，一個喺東岸，一個喺西岸，距離勁遠！

足球員最需要嘅就係體力，如果冇體力，技術再好都係冇用；悉尼對光輝呢場波，最大嘅分野就係在於雙方球員體力，珀斯光輝五日內連續兩場作客，出戰完布里斯班獅吼後，今場又要飛去冇雷公咁遠嘅悉尼，光輝班球員邊有咁快回得切氣呢，真係鐵人都頂唔順啦！
對賽往績悉尼贏條街

相反，FC悉尼今場可以逸待勞，上場作客嘅對手都只係同市球隊西悉尼流浪者，今場又喺主場迎戰，體力肯定好過對手N倍，再加上球隊對賽往績佔優，近六次主場對住光輝贏咗五仗，所以球隊今場即使有後衞懷奧停賽、中場主將艾希爾菲同前鋒哥利加美路因傷缺陣，但仍相信悉尼主場夠料砌低珀斯光輝，今場主勝咪錯過！