心傷櫻花殘陣難阻松鼠

猪拉多纳

除咗爭霸，日職護級尚有一線懸念，目前包尾嘅德島漩渦同尾二嘅大阪櫻花已篤定降班，尾三嘅大宮松鼠落後尾四嘅清水心跳三分，今仗松鼠必須全取三分，同時望心跳輸波至可以逃出生天，機會唔高但唔會放棄，何況明午松鼠主場遇上嘅正係啱啱確定降班嘅櫻花，松鼠戰意遠勝對手，主勝值得一試。

大阪櫻花高層管理不善，今季奉行明星政策，先後搵嚟烏拉圭球星科蘭同前德國國腳卡卡奧助陣，可惜兩人黃金期已過，變成中看不中用，王牌前鋒杮谷曜一朗季中又轉投瑞士巴素利，仲要行正衰運，隊長兼中場命脈山口螢因為右膝重創成個下半季都長抖，搞到未到煞科日已經救唔番。今場櫻花連卡卡奧同後防重心扇原貴宏都一齊停賽，作客面對背水一戰嘅松鼠真係凶多吉少。