費倫 祖記「大」無畏

猪拉多纳

攻擊好手撻着副偈

今晚意甲獨腳戲由費倫天拿主場硬撼祖雲達斯，「紫百合」前鋒馬里奧高美斯上輪聯賽開齋，難得撻番着副偈，當然想繼續數胡，撞啱「老婦人」箭頭泰維斯同洛蘭迪亦都弗到漏，近期頻頻有進帳，今場兩軍碰頭實有入球騷，一於捧2.15倍入球大！

（TVB301周六凌晨3:45直播）

費倫天拿最近連踢3場作客波，賽程都幾惡啃，但佢哋照贏晒，仲全部開入球大，其中兩大進攻泉源侯馬同古達度齊齊有斬獲不特止，德國箭頭馬里奧高美斯上仗鬥卡利亞里，更成功取得今季首粒入波，對住防線唔齊腳嘅祖雲達斯，梗要食住個勢再爭「士哥」啦！
「老婦人」後防唔齊腳

祖雲達斯啲後衞的確幾黑仔，巴沙利同馬田卡沙利斯養傷多時唔在講，羅姆路蘇沙日前做完手術又話抖到出年，右閘列治史迪拿坐波監更隨時成為後防漏洞，今場想唔失波都幾難咯。

但講到進攻火力嘅話，「老婦人」就一啲都唔輸蝕，除咗中場保羅普巴同維達爾後上攻門夠煞食，前線拍檔泰維斯同洛蘭迪近4場更聯手貢獻7球，就連派路上場都有神來之筆，相隔兩年半後再以「生波」建功，邊使驚佢哋冇貨交，今場一於擔定櫈仔等睇入球騷！